 Pedro Atacho Tin polítikonan tin problema ku e hecho ku un hóben empleado públiko den persona di Horacio Castro mihó konosí komo “Toni” a disidí di subi riba lista di PAR. Den un publikashon periodístiko ta sali na kla ku tin partidonan polítiko den Parlamento di Antia tin problema ku un trahadó di Griffie di Parlamento a disidí di ehersé su derecho demokrátiko pa partisipá den e elekshon benidero pa Konseho Insular.
 Horacio Castro E derecho di un persona pa vota i wòrdu skohe den Konseho Insular ta un derecho konstitushonal i ta ankra den artíkulo 7 di Eilandenregeling Nederlandse Antillen (ERNA). Den e lei aki i den Staatsregeling di Antia ta preskribí den kual situashon un hende no por pone su mes disponibel pa wòrdu skohe komo konsehal. Esaki ta den kaso: - si un hende ta Gobernador;
- si un hende ta Gezaghèber
- si un hende ta mas yòn ku 21 aña
- si un hende no ta residensha aki
- si e ta ekskluí pa wòrdu skohe pa motibu di sierto krímen, buracheria, limosnero òf “landloper”.
Kustumbernan ku por a stroba un persona ku ta traha na Griffie di Parlamento pa subi riba lista di kandidato mester konsiderá komo un akto ilegal i kontra e derecho fundamental di un siudadano ku ta biba den un pais demokrátiko. Ta asina tambe den pasado kier a limitá polisnan di subi riba lista di kandidato pa motibu di kustumber. Awendia ta normal ku un polis òf otro funshonarionan ta subi lista di kandidato ehersiendo nan derecho konstitushonal. Ta inaseptabel ku kier forsa un hende pa kambia di trabou pa motibu ku e ta ehersé su derecho demokrátiko. PAR ta vigilá pa ningun polítiko viola demokrasia pa motibu di polítika partidista.
Tony Castro te ainda no ta gobernador ni gezaghebber i ta kumpli ku tur eksigenshanan legal meskos ku tur otro empleado públiko pa por subi riba lista di kandidato di un partido polítiko. Dikon e mesun polítikonan aki no ta reklamá ku tin hefenan di servisio di gobièrnu riba lista di kandidato pa elekshon? Dikon e polítikonan aki no ta reklamá ku tin inspektornan riba lista di kandidato? Dikon e polítikonan aki no ta reklamá ku tin otro empleadonan públiko riba lista di kandidato?
No, e polítikonan aki a skohe pa ataka e derecho demokrátiko i konstitushonal di un hóben ku a disidí di subi riba lista di kandidato di partido PAR. Ta di manera aki kier deskurashá hóbennan pa nan asumí responsabilidat i konstruí na adelanto di pais? Mi ta denunsia e gòlpi baho aki públikamente i ta reta e polítikonan òf nan satélitenan pa kita nan máskara i bisa ta ken nan ta! Di e manera aki pueblo di Kòrsou por sa ta ken ta esnan ku kier trapa derechonan konstitushonal di hende den un pais demokrátiko manera esun di nos.
Pueblo sea alerta pa polítikonan ku kier violá nos demokrasia. |
