Ta inkreibel kon lihé sierto hende ta lubidá! Parse ku sierto di nos polítikonan ta kampion den esaki.

 

Tempu ku a tene e asina yamá 'start-Ronde Tafel Conferentie' na Breezes, fin di aña 2005, Etienne Ys (e tempu ei promé minister di nos pais) a logra konvensé Hulanda pa yuda solushoná nos debe nashonal. Reunion no a kaba, o diferente polítiko a deklará ku Etienne Ys no ta papia bèrdat. Ku Hulanda no a primintí esaki i ku nan ke weta e nótulonan di e reunion. Nótulonan a sali, probando ku e polítikonan no tabatin rason i ku Etienne Ys a papia bèrdat!

 

Emily de Jongh-Elhage a bira promé minister di nos pais na aprel 2006  i e pólitikonan a deklará ku ta di weta ku Hulanda ta kumpli ku su palabrashon di 2005. Ku Hulanda lo kibra su palabra, etc. etc. Pero Emily a bai Hulanda na novèmber i a logra ku den 'slotverklaring' a pone bon kla kon Hulanda lo yuda nos solushoná nos debe nashonal. Mas aun, Emily a logra konvensé Hulanda pa pone fondo adishonal disponibel pa proyèktonan sosial-ekonómiko (e asina yamá Sociaal Economisch Initiatief, SEI)!

Mesora e polítikonan mediokre, ku pa di dos biaha siguí a keda desenmaskará, e buska otro èksküs. Ku no por mara debe nashonal na struktura estatal, ku ta di weta ku Hulanda lo kumpli ku e SEI, etc. etc. I mientras e kachónan ta wòw, karavana a sigui. Komo ku e politikonan en kestion na vota kontra di e slotverklaring, Kòrsou a kai chikí kompará ku e otro islanan ku sí a bai di akuerdo ku e slotverklaring.

 

Pero nos promé minister Emily de Jongh-Elhage e ora ei a logra konvensé Hulanda ku no por kastigá Kòrsou pa e tèrkedat di su polítikonan i Hulanda a bai di akuerdo pa pone fondonan disponibel pa gobièrnu sentral den kuadro di SEI.

Inkreibel kon hende sa lubidá! Kasi kasi bo ta kere ku ta pa malu e polítikonan akí a lubidá i ta malinformá pueblo. Danki Dios tin hende serio i sinsero manera Emily de Jongh-Elhage ku tin bienestar di nos pueblo na pechu!