Si tabata na Sr. Damoen di partido Forsa Kòrsou, e pais aki lo tabata den un situashon aun mas penoso ku e ta den awe.
 
Den e deklarashon di sr. Damoen di e último dianan aki, ta opvio ku e ke sigui bisti e gobièrnunan di PAR e kashaka di debe nashonal. Pero si ta bon, Sr. Damoen komo un di esnan prinsipal ku tin di kuida e pòtmòni di gobièrnu, sa muchu bon ku e realidat ta ku subida di debe durante di e periodo di PAR ta prinsipalmente debí na formalisashon di debe bieu.

Por ehèmpel: 600 mion na debe skondí na teritorio insular di Kòrsou ora PAR a tuma over na 1995, 400 mion na APNA pa motibu di un Zero coupon Bonds, alrededor di 700 mion komo debenan no formalisá entre diferente instanshanan gubernamental.

 

Si nos konta esakinan so kaba i pone huntu ku e +/- 2.3 miar ku PAR a bin haña, ya nos a yega na 4 miar. Pues si e debe nashonal aworakí ta na 5 miar, anto por dedusí ku ta apénas +/- 1 miar ta originá for di tempu ku PAR a lanta.

 

Naturalmente tabatin falta di disiplina presupuestario tambe, i no papia mes di e gobièrnunan ku signatura di FOL, ku a hinka tur rapòrt den lachi, a pone disiplina presupuestario totalmente un banda, i hasta a drai bek desishonnan importante.

Tambe Sr. Damoen sa muchu bon, ku gobièrnunan di PAR no a haña ta responsabel pa redusí défisitnan mas tantu, pa e simpel hecho ku esaki lo a kondusí na un desaster total den pais aki, ya ku servisionan importante na pueblo lo a sufri aun mas ku ya tabata e kaso.

 

Nos lo a haña nos den un situashon kaminda lo tabatin aun mas ménos sèn pa kombatí kriminalidat, ménos sèn pa hinka den enseñansa, ménos sèn pa hinka den salubridat públiko, ménos sèn pa hinka den desaroyo ekonómiko. I si esaki lo a  pasa, dios sa kon lo tabata para ku e pais aki awe.

 

I ta bon tambe pa tur hende sa, ku si tabata na Sr. Damoen di Forsa Kòrsou, ta e situashon aki lo nos tabatin, pa motibu ku tur su konsehonan na gobièrnu, lo tabatin e situashon ya deskribí komo resultado. Danki dios gobièrnunan di PAR no semper a sigui Sr. Damoen su konsehonan, paso esakinan si lo a fòrsa Kòrsou i Antia di bèrdat.

I ku si e debe a sigui krese ta paso, manera ya indiká, gobièrnunan di PAR no ta kier a hinka e pais aki den un situashon aun mas penoso ku e ta den. Pero den mesun rosea gobièrnunan di PAR tabata konsiente ku mester a hasi algu na e debe nashonal, i ta pa e motibu aki ya pa basta tempu a bin ta papia ku Hulanda pa yudansa den esaki.

 

Awe, e yudansa aki Kòrsou (ku su 4.2 miar na debe) por bien lubidá riba esaki, ku rechaso di e asina yamá “slotverklaring”. Pues, en bes di Sr. Damoen buska di bisti gobièrnunan di PAR e kashaka di debe nashonal, e i su partido lo hasi bon pa bini ku un alternativa real pa e situashon ku nos ta sigui aden. Paso su partido, siendo un di e partidonan ku ta kontra e “slotverklaring”, tambe debe pueblo esei.