"E palabra rekonsiliá ta un palabra poko grandi. Mi no a bai for di PAR. Ma keda miembro di partido semper pero no aktivo paso no tabatin kontakto entre gerentenan di partido i ami. Pues rekonsiliá no ta e palabra korekto”.

Esaki ta loke Mike Franco a kontestá LA PRENSA, ora a puntr’é si el a rekonsiliá ku su partido.

 Franco a konta ku, Promé Minister Emily de Jong Elhage a yam’é dos siman pasá i nan a kòmbersá un ratu ameno na telefòn. Seguidamente tabatin un enkuentro i nan a papia di entre otro loke a pasa aña pasá. “Nos a konkluí ku, loke a pasa tabata mas bien basá riba un mal komunikashon. Sra. de Jong a splika mi ku, e tabata ke su mihó hendenan den e ‘line-up’ pa e próksimo elekshon, i a puntra mi si mi ta disponibel pa PAR. Mi a kontest’é ku semper mi a saka man pa yuda mi pais i ku lo mi bolbe hasié si pidi mi”.
 
Mas aleu Franco a bisa ku, e no sa ainda den ki forma e lo bai yuda PAR pa bai elekshon, ni ku kisas asta e lo por subi lista. “Mi ke bisa si ku, si mi presensia riba lista por duna un aporte, esei lo ta bon”.
 
Durante e fundraising di PAR, djabièrnè último, Franco a presentá pa promé bia den seno di e partido, for di despues ku el a baha komo diputado 7 luna pasá. “Mi a eksperensiá mi presensia komo plasentero. Hopi hende a mustra mi ku nan a sinti mi falta i ku nan ta kontentu ku mi ta bèk. Lo mi ta un mandatario atrobe si e oportunidat presentá. E trabou ta sumamente interesante i e ‘feed back’ ku mi a haña semper, tabata indiká ku e hendenan a haña mi nivel haltu”, Franco a bisa na final.