Remco Gomez

E impreshon aki ta ser krea pasombra no tabata tin un prosedura di solisitut habrí i tambe pasombra aparentemente a keda disidí ku e primu mes lo determiná despues ta kiko ta bira su kondishonnan di trabou.  Algu ku si resultá ku esaki ta bèrdat, ta un asuntu totalmente inakseptabel.

Sigur ora ta trata di un famia ta indispensabel pa tene un solisitut habrí.  Si bo hasi esaki, anto ku rason bo ta krea den komunidat e impreshon ku bo ta praktikando nepotismo.  Esta faboresé bo famia ora bo ta ehersé un funshon públiko. Di un Diputado manera Nelson Pierre ku semper tin su boka yen di étika i bon gobernashon, nos lo a ferwagt otro.  O a kaso ora ta trata famia, étika i bon gobernashon no ta konta pa sr. Pierre?

Sigur ora ta trata Farley Hernandez, kaminda tin dudanan serio ku e ta sufisientemente kapasitá pa por manehá un kompania manera Dòk, tabata imperativo pa tin un prosedura di solisitut habrí pa asina komunidat por tin e garantia ku un hende kapasitá ta keda nombra. Un prosedura asina lo a kumbiní sr. Farley Henrandez mes, pasobra e lo a kita tur duda riba e hecho ku si e ta kapasitá pa manehá Dòk si òf nò. Awor aki komunidat ta sintá ku e situashon ku un persona a ser nombrá komo direktor di Dòk, kaminda pueblo no sa si e lo por reskatá e kompania.  Pasobra un kos ta sigur, nombra den e situashon aktual di Dòk un hende ku no ta kapasitá, ta un sentensha di morto sigur pa a kompania.

A bira tempu pa den nos pais polítikonan stòp di hasi wega ora ta trata nombramentu di direktornan di kompanianan di gobièrnu. Mester bini proseduranan preskribí ku ta garantisá ku semper e mihó kandidato ta ser nombrá, los por for di kualke koló polítiko. Polítikonan mester bira serio den esaki, pasobra e daño ku nan por kousa pa komunidat ora nan ta nombra un hende no kapasitá komo direktor, sea esaki ta un famia o un simpatisante polítiko o nan mes, ta inmenso. Sea un persona asina ta kosta komunidat miónes ku su mal maneho o e ta kibra e kompania, debilitando asina nos kompania i lagando tur e trahadónan desampará.