Remco Gomez

Entre otro nos a komprondé ku tin sierto bario, por ehèmpel Barber i besindario, ku tin problema pa risibí e señal di TDS.

Esaki a wòrdu konfirmá dor di un yamada na e number di informashon 9221, mayoria kanalnan no ta funshoná 100 %, algun kanal nunka ta disponibel, hopi biaha klientela tin ku warda dimas pa TDS bin atendé nan na kas,pantaya ku ta vris i e señal di e decoder ku ta bai bin kreando un efekto manera zwaailicht di lusnan kòrá i bèrdè di e decoder. Kuantu mas klientenan tin di keda sin servisio ?

Miéntras tantu nos por a tuma nota ku den avisonan TDS ta gradisí su abonadonan pa nan pasenshi i komprenshon pa e problemanan ku TDS a eksperensia últimamente i alabes ta ofresé e abonadonan e pakete di Family komo kompensashon.

Hasiendo uso di artíkulo 37 di reglamentu di òrdu frakshon di PAR kier a hasi algun pregunta na Bestuurscollege (BC) enkuanto TDS:

1. BC por a informá Konseho Insular ta kua ta e barionan ku no por òf tin problema pa risibí e señal di TDS ?

2. BC por a informá Konseho Insular ta kua problema tékniko tin pa ku e señal òf e decodernan ?

3. BC por a informá Konseho Insular ku ta maneho nobo tin enkuanto kompensashon ora tin problema ku servisio di TDS ?

4. BC por a informá Konseho Insular ku TDS den futuro serkano lo bai hasi uso di teknologia nobo pa aliviá su abonadonan ?

5. BC por a informá Konseho Insular ku TDS lo tin plan pa evaluá su paketenan ku nan ta ofresé nan klientela i kua servisio nobo TDS lo bai ofresé su klientela ?

6. BC por a informá Konseho Insular si ta bèrdat ku e direktor di TDS ta bayendo ku penshun ? Si esaki ta bèrdat, ta intenshon pa kuminsá ku e proseso pa buska otro direktor ?

Remco Gomez Miembro di Konseho Insular pa PAR