Ta mas ku 50 aña pasá ku nos a akseptá e aktual struktura estatal. I e elekshon di 20 aprel aki atrobe lo ta determinante pa e kontenido di e Korsou Outónomo, ku nos pueblo a vota pe. E lo nifiká un futuro briante òf unu insigur pa nos mes i pa nos yunan?

 

Pues, no ta un elekshon manera esnan ku nos konosé ya ta mas ku 50 aña.

 

No! E elekshon aki lo trese kuné kambionan grandi pa nos komunidat. Partido PAR no ke laga ningun duda riba e punto aki. PAR ke papia palabra kla pa tur hende den nos komunidat ta konsiente di e peso di e elekshon aki. Mas ku nunka nos pueblo Kurasoleño mester di Lidernan serio, fuerte, íntegro i konfiabel. Lidernan kapas i determiná pa hiba nos patria dilanti i kuida su bienestar i e porvenir di nos hendenan. Lidernan ku por bisa kla kiko nan ta para pe i ku no ta desviá di esaki den nan aktuashon i kompromiso ku pueblo.

Lidernan ku ta duna bo informashon korekto i sinsero p'asina bo mes por husga.

 

 

E proseso a tuma tempu i mayoria di polítikonan di Kòrsou tabata envolví, huntu ku nos mihó yu di Kòrsou profeshonal riba tereno estatal i no ménos ku 4 Ministro Presidènt. Un trayekto ku a pone base pa futuro di e Kòrsou outónomo den Reino Hulandes manera pueblo a skohe p'e den un referèndem.

 

Tabata mas kla ku di dia ku e Slotverklaring aki no ta e dokumento final, pasobra e Konferenshá di Mesa Rondó ta duna oportunidat pa trese kambio ainda. Entre otro tata di partido MAN Don Martina a konfirmá ku pa e motibu aki e a akseptá e Slotverklaring. E tempu aya Aruba hasta a trese kambio den asuntu di independensia sin ku nunka Hulanda a palabra ku nan ku por tin kambio despues.

 

Anto sinembargo 13 polítiko den Konseho Insular di Kòrsou sin ningun klase di eskrúpulo i kasi sin representashon den pueblo a haña bon pa start un bagamunderia bergonsoso di marka mayó. En bes di diskutí ku seriedat riba e futuro di nan pais Kòrsou ku nan ta pretendé di defendé, nan a start un periodo di trosementu di bèrdatnan i bèrgwensa nashonal.
Ta ku e polítikonan aki nos mester bai pa futuro di Kòrsou outónomo?

Laga mi ketu yu!

 

 

 

Den esena polítiko tin hopi persona ku no por surpasá nan interes personal. P'esei ta dependé kiko e polítikonan aki ta buska den polítika. Den e dokumento tin proposishonnan di lei i diferente struktura hurídiko pa limitá i evitá ekseso i oportunismo polítiko. A krea basta kontròl pa stroba polítikonan ku sinta den Gobièrnu di kai den tentashon di graps algu pa nan mes òf pa nan amigunan. Tur e leinan aki ta pa protehá interes di nos pais Kòrsou i nos poblashon.
No ta asina straño tampoko ku e aspekto aki a haña hopi atenshon. No ta dos tres hende so a ser hiba korte den último añanan pa motibu ku nan dede tabata muchu largu.
Wèl, p'esei mes nos di PAR mester defendé nos futuro pais Kòrsou kontra esnan ku no sa kiko ta di nan i kiko ta di Kaha di Gobièrnu. E garantianan ei a ankra den struktura estatal benidero di nos pais.
Bo ta komprendé awor pakiko sierto polítiko i nan kompinchi na Radio i den korant a lanta bula un bes pa purba kibra sosten di e Slotverklaring?

Sigui chèk e gainan aki bon ora nan habri nan boka.

 

 

Periodista John v/d Heuvel ta atmití den de Telegraaf di 29 di Yanüari último ku kriminalidat na Korsou a baha. E ta bini algun biaha pa aña pa reportá riba situashon di kriminalidat pa su korant de Telegraaf. E a publiká un buki riba trafikashon di kokaina i labamentu di plaka riba islanan di Antia un par di aña pasa.

 

Na kuminsamentu di e aña aki si el'a bin topa un Kòrsou kaminda hendenan a kuminsá ripara ku kriminalidat ta bou di kòntròl di outoridatnan.

 

John v/v Heuvel ta skirbi: "Pa di promé biaha "kan zelfs een misdaadjournalist chillen op de Antillen!".

 

Un pabien pa nos gran Ministro di Hustisia David Dick u a sòru pa baha atrako ku 50%.

 

 

"Nos lo no permití pa Kòrsou ser rekolonisá. Esei ta inakseptabel. Kòrsou ta di yu di Kòrsou!".

Ekspreshon di un senador femenino blou den su afan pa subi pantaya polítiko den un programa radial.

Nos ke sita un kombersashon riba tribuna di festival sènter durante karnaval. Un yu Kòrsou di edat grandi ta bisa un konosí ku e a kaba di topa: "Ta di kon tin tantu makamba asina den e lugá aki?". E señora ta kontest'é: "Ma Donny, nos hendenan no a drenta Hulanda y poderá di nan pais?".

 

Ku mas di 100 000 yu di Kòrsou na Hulanda i ya kaba 20 yu di Kòrsou aktivo den polítika Hulandes bo por puntra bo mes: ta ken ta bai kolonisá ken.

 

Pero bon, kada ken ku su kos. Si e dama blou aki ke usa e tema antikuá di rekolonisashon pa splika su punto di bista ta su derecho. Pero e no sa ku alabes e ta pinta yunan di Kòrsou komo hende sumiso i humilde i hasta bobo?. Komo si fuera ta riba e dama aki tur tabata warda pa ser salba.

 

Pa nos e ta un ofensa di grado mayor i inakseptabel! Punto.

 

• Meta ta pa eliminá tur retraso riba tereno di bienestar di nos poblashon
• Garantisá un mihó bida pa nos i nos yunan dor di kuminsá eliminá e "debe" sosial ku tamanifestá su mes den pobresa, kuido, bario, deporte, ekonomia, kultura, kreamentu di trabou, formashon, enseñansa
• Esaki ta kuminsá den 2007 i tin un trayekto di 4 pa 5 aña
• Lo eksihí un invershon di por lo ménos f. 1000 mion di Hulanda i Kòrsou huntu.

Te ainda nos no por kaba di komprondé kon 13 hende ku dos dede di sinti por a vota kontra e strategia aki pa salba bienestar di nos poblashon. Kibrando asina perspektiva di míles di hende na Kòrsou.
Pueblo su outonomia ta start ku su propio bienestar.
I pueblo ta vota pa polítikonan pa esakinan kuida i engrandese su bienestar.
Na 2007 mester skohe entre esnan ku tin bienestar di pueblo na pechu i esnan ku ke papia bai gol basta nan keda den puesto polítiko pagá.