Página prinsipal Papiamentu Pa falta di eksperensha den konseho insular sr. Damoen ta pega barku ketu bai

Pa falta di eksperensha den konseho insular sr. Damoen ta pega barku ketu bai

Wednesday, 18 July 2007

Remco Gomez Frakshon di PAR a keda babuká ku e diferente komunikado di prensa ku señor Damoen di Forsa Kòrsou a manda i den kual e ta akusá partido PAR i PNP di tin dòbel moral enkuanto e areglo di oumento di salario, areglo nobo di penshun ku wachtgeld pa mandatario. Señor Damoen a bai asina leu den e kaso aki bisando ku frakshonnan di PAR i PNP a vota kontra un moshon pa anulá e  oumento di salario proponé dor di Forsa Kòrsou. E insinuashonnan aki ta un mentira flagrante, paso niun ora so no a presentá ningun moshon den e reunion públiko. Na promé lugá señor Damoen a lanta bisa ku e kier bini ku un moshon.Kaminda ku reglamentu di òrdu ta bisa ku esaki no por. Presidente di Konseho Insular a splika señor Damoen ku e tópiko mester wòrdu pone riba agènda i despues ku hiba debate por presentá un moshon. Konsekuentemente Forsa Kòrsou ta ke  pa añadí un punto na e agènda di reunion pa diskutí e areglo. E proposishon aki a keda rechasá pasombra ya kaba e asuntu a bai gobernador i mester laga e asuntu aki kana su kaminda. Kiermen nunka no a presentá un moshon. Nos ta komprondé ku señor Damoen ta nobo den Konseho Insular i ta un poko bèrdè ainda i porta pa falta di konosementu di proseduranan i funshonamentu di Konseho Insular e ta brua kos den otro.Nos ta konsehá señor Damoen pa e no gasta su tempu skirbi tantu komunikado kaminda e ta malinformá pueblo pero tuma su tempu espesialmente durante di e reces aki pa e bai studia su dokumentunan manera ERNA i Reglamentu di òrdu ya e ora ei e sa di kiko e ta papia, ki ora e por papia den reunionnan pasombra si e siguí di e manera aki ta barku so e te keda pega. Tur hende sa ta kiko partido PAR su posishon ta den e kaso di e areglonan di oumento di salario i areglo di penshun.Posishon di PAR ta hopi kla. E trayekto di penshun i salario na nivel insular mester keda atendé di nobo a base di prinsipionan di bon gobernashon pa asina yega na un areglo ku ta aseptabel den nos komunidat. Señor Damoen tin ku stòp di práktika su polítika di flip flop di no tin posishon i kore bai pa tuma desishon.Pa loke ta trata e asuntu di supuesto dòbel moral di PAR lo siguiente, nos ta komprondé dikon señor Damoen ta kontra e areglo aki no solamente pasombra e proseduranan no a kana korekto i transparente pero tambe pa su mes probecho personal. Den e areglo nobo un miembro di Konseho Insular no por ta part-time mas kiermen señor Damoen lo bai atras den entrada i mester tuma un salario mas abou ku loke e tin aworakí, siendo komo hefe di finansas e ta gosa di salario plùs toeslag i schadeloosstelling di part-time. Anto ta asina aki señor Damoen ke papia di dòbel moral ? Remco Gomez

 

< Prev		Next >