Saneamentu di debe i fondo poné disponibel pa e Inisiativa Sosial Ekonómiko lo pèrkurá pa Kòrsou por kuminsá un bida nobo i plaka lo ta disponibel pa un futuro próspero. Ehekushon di e Deklarashon Final lo redusí e kuota di debe di 85% te ku 13% di nos produkto nashonal.

 

Esaki no solamente lo ta un alivio enorme di gastu di interes, pero tambe un mehorashon konsiderabel di klima di invershon.

Asina Asosiashon di komersiante di Kòrsou ta konkluí den nan newsletter di 29 di mart 2007 .

 

Den e newsletter VBC ta sigui deklará kon nos asina yama representantenan ta:

• bula pipa pa diskushon i debate pasobra klaramente nan no tin argumento konvinsente;

• un sèt di kobarde ku a vota kontra, pero no tin e kurashi pa drenta den un diskushon públiko;
  
  
• keda sin duna balor na ekspertisio i konosementu di nos ekspertonan lokal ku a yuda negoshá e akuerdo;
  
  
• ta falta rèspèt i no ta ni duna atenshon na konsehonan di:
   - sinku eks-Minister Presidènt,
   - Presidente di Korte Komún,
   - Presidente di Banko Sentral di Antia Hulandes,
   - eks Gobernador di Antia Hulandes,
   - Vise Presidente di Konseho di Konsulta,
   - miembro di Konseho di Konsulta Hulandes,
   - bankeronan,
   - huristanan i otro ekspertonan lokal.

Manera konosí partido PAR ta para pa aseptashon di e akuerdo aki pa porfin, despues di 25 aña di sufrimentu ekonómiko i retraso sosial, nos kuminsá dal stap den e direkshon korekto. Ta tristu pero bèrdat: tin partido polítiko ku ke perkurá pa nan bienestar promé ku nan ke ni sikiera konsiderá traha na benefisio di Kòrsou.

Te awe, mas ku 4 luna despues ku e grupo di 13 polítiko a rechasá slotverklaring, no tin nada ku ta ni parse un alternativa realístiko. En bes di esei ta insultá, a zundra, a sapatiá i a hinka masha hopi esfuerso den krea konfushon.

Dikon PAR no ta sorprendé pa e aktitut i griteria di nos oponentenan polítiko? Ta masha fásil. Ya ku nan lo no logra di konvensé pueblo no keda nan nada otro ku krea un ambiente di konfushon. Nan ta hunga ku emoshon di pueblo na nan antoho. Nan ta blo hasi deklarashon ku ta mitar bèrdat, mitar fantasia. Ta krea ilushon di spoki pa spanta hende i na mes momentu ta propagá pa aktua sin miedu. Nan ke bende patrimonio di pueblo i ninga yudansa di Hulanda, e úniko pais na mundu ku por i ke yuda nos. Nan speransa ta ku si nan logra bruha pueblo, pueblo lo no huzga nan pa e malhechornan ku nan ta.

Hopi skuma, nada di chukulati.

Si pueblo ke salba pueblo di bèrdat: Vota PAR!