|
Partido PAR ta kontra di e proposishon final riba areglo di penshun |
|
Monday, 28 May 2007 |
 Glenn Sulvaran Partido PAR ta kontra di e proposishon final riba areglo di penshun pa miembronan di Konseho Insular, manera presentá na Konseho Insular. Djabièrnè último 25 di mei, frakshon di PAR den Konseho Insular a risibí di Bestuurscollege e proposishon final riba areglo di penshun pa miembronan di Konseho Insular. Meskos ku tabata e kaso ku e promé proposishon ku Frakshon di PAR a risibí djaluna 21 di mei, esaki tampoko no por konta ku sosten di PAR manera e ta presentá.
PAR ta di akuerdo ku mester bini ku un areglo di penshon pa miembronan di Konseho Insular full-time ya ku pa basta aña kaba nan ta pagando nan prima di penshun. Loke si partido PAR ta para riba ta, ku un areglo asina mester ta rasonabel i hustu. Ta p’esei mes PAR tin problema ku e proposishon ku ta riba mesa aworakí. E loke ta ser proponé aworakí ta inaseptabel ya ku e ta eksagerá i fuera di proporshon. Pa PAR ta por ehèmpel inaseptabel ku ta bini ku un proposishon ku ta sali for di un salario ku ta mas haltu ku bo tin aworakí (pensioengrondslag). Bo penshun mester ta basa riba e salario ku bo tin na momento ku bo ta baha, i no riba un salario mas haltu ku bo NO tin. Tambe PAR ta haña inakseptabel ku bo ta bin ku un areglo kaminda bo ta krea bo penshun den 9 aña. Esaki tampoko ta rasonabel i hustu. Tanten ku Bestuurscollege no bini ku un proposishon rasonabel i hustu Partido PAR lo no duna sosten na un areglo di penshun pa miembronan di Konseho Insular. |
