PAR a tuma nota ku e nombramentunan polítiko den e gobièrnu anterior a kousa rabia den tur sektornan den nos komunidat i ku nan rason. Laga nos pone for di akinan i na un forma bon kla ku PAR no tin arte ni parti den e desishonnan aki, ya ku ta e gobièrnu anterior a tuma e desishonnan aki.

 

Ya for di 29 di mei PAR, pa medio di sr. Mike Wilem, a reakshoná mesora i a saka un komunikado di prensa kaminda PAR ta pone su posishon bon kla riba e manera ku e nombramentunan aki a bai.

 

Partido PAR ta kontentu ku tin un konsenshi nashonal ta lantando ku mester tin un manera transparente i profeshonal pa atendé ku nombramentunan den funshonnan haltu i ku no por sigui asina. PAR ta kompartí e opinion aki kompletamente i tin komprenshon pa e sentimentu di indignashon ku tin den nos komunidat na e momento aki.

 

Di otro banda e proseso pa ku e nombramentunan en kuestion aparentemente no a duna Gezaghebber di Teritorio insular di Kòrsou motibu pa presentá esakinan den 2 biaha 24 ora pa destrukshon na Gobernador (lesa: Gobièrnu Sentral). Komo tal PAR tin di sali for di e punto di salida ku aparentemente esakinan a tuma lugá di forma legal. Revokashon di desishonnan di nombramentu tuma dor di e gobièrnu anterior por sosodé solamente a base di lei den kaso ku esakinan no a tuma lugá di forma legal.  

En todo kaso PAR ta garantisá pueblo di Kòrsou ku nombramentunan den funshonnan haltu tantu den e aparato gubernamental komo den kompanianan anónimo i fundashonnan di gobièrnu mester den tur kaso bai tuma lugá ku e transparensha nesesario i ku e esakinan mester sosodé a base di solisitut habri, irespekto kua Gobièrnu ta sintando.

 

E gobièrnu ku signatura di PAR mester asumí responsabilidat di gobernashon dia 2 di yüli próksimo. E promé meta di e gobièrnu ta pa presentá un programa di gobernashon a base di e akuerdo polítiko firma entre PAR, FOL i PNP na Konseho Insular pa aprobashon. E programa lo pone debido atenshon na proseduranan transparente i ku ta kuadra ku prinsipionan di bon gobernashon den asuntunan ku ta korespondé ku tipo di nombramentunan aki en partikular, i maneho di personal en general.

 

E aktual gobièrnu di transishon lo mester hasi e trabounan di preparashon nesesario pa e programa menshoná. En todo kaso pueblo por tin e siguransa ku bou di gobièrnu di signatura PAR nombramentu polítiko manera a tuma lugá den e último simannan aki, esta sin solisitut habri pa funshonnan haltu kaminda ku personanan ku no ta kapasitá pa e funshon spesífiko ta ser nombra i bentaha  paso nan ta polítiko, lo no por ta posibel mas.