Remco Gomez

Tur aña tin problema pa yena e vakaturanan den enseñansa. E eskases di maestro aki ta wòrdu krea primeramente dor ku nos no ta formando sufisiente maestro i na segundo lugá ta ku pa diferente motibu nos no ta logra atraé sufisiente maestronan for di eksterior. (Hulanda, Sürnam) Un di nos problemanan ta ku e salario ku e maestronan ta gana aki na Kòrsou no por kompetí ku loke e maestronan ta gana na Hulanda òf den sektor priva.

Ademas pa skolnan di fundeshi tin e problema di e lenga papiamentu kual ta buta ku kasi bo no por atraé maestronan hulandes pa yuda aliviá e situashon. E problema mas grandi i menasante pa nos enseñansa ta ku den e proximo dies aña un parti grandi di nos maestronan por bai ku penshun.

Muchanan tin derechi riba enseñansa i esaki mester ta kalidat. Mas ku nunka Kòrsou mester di hóbennan bon prepará pa yuda pais bai dilanti.

Frakshon di PAR den Konseho Insular ta preokupá pa e desaroyo aki i pa esei ta hasi uso di art. 37 di R.V.O pa haña klaridat kon Bestuurscollege  (BC) ta bai atendé e asuntu aki.

1. BC por a informá frakshon di PAR den Konseho Insular kuantu maestro ta bini na remarke pa bai ku penshun e proximo dies aña?
   
   
2. BC por a informá frakshon di PAR den Konseho Insular kuantu maestro ku ta penshona kaba ta trahando den enseñansa na e momentunan aki?
   
   
3. BC por a informá frakshon di PAR den Konseho Insular kiko BC ta bai hasi pa hasi e fishi di maestro mas atraktivo?
   
   
4. BC por a informá frakshon di PAR den Konseho Insular kon BC ta bai antisipá riba e ola grandi di personal di enseñansa ku lo bai ku penshun den e proximo añanan?
   
   
5. BC por a informá frakshon di PAR den Konseho Insular kuantu maestro Akademia Pedagógiko ta forma pa aña i ki e proyekshon ta pa e añanan benidero?

Remco Gomez