Resientemente representantenan di “Conferencia Permanente de Partidos Políticos de América Latino (COPPPAL)” tabata na Kòrsou kaminda nan a tene un konferensha regional den Hilton Hotel. Tambe nan ta tin un enkuentro ku representantenan di Bestuurscollege (BC).

 

Grandi tabata e sorpresa pa frakshon di PAR ora nos a tuma nota for di den medionan di komunikashon ku e gastunan e.o di estadia a wòrdu paga pa Curaçao Tourism Board (CTB) riba instrukshon di BC.

Ku otro palabra un organisashon polítiko internashonal a bin Kòrsou pa sostené su aliadonan polítiko na Kòrsou, anto CTB ku plaka di pueblo mester finansiá un aktividat polítiko riba instrukshon di BC.

 

Un di e konklushonnan di e bishita di COPPPAL tabata pa BC informá nan i alabes buska sosten internashonal den kuadro di realisashon di e proseso pa Kòrsou yega na su status outónomo. E partidonan ku ta forma e aktual BC ta di opinion ta ku Hulanda ta abusá di Kòrsou dor di kombiná trayektonan finansiero i struktura estatal. Hasta COPPPAL lo a tuma un resolushon ku ta sostené e pensamentu aki. COPPPAL lo kordiná un proseso pa denunsia Hulanda, na diferente instansianan internashonal komo pais ku ta práktika rekolonisashon.

 

Frakshon di PAR no ta komprondé kon e partidonan FOL, MAN i PLKP, tur ku representashon den eilandsraad  a bai di akuerdo na start-ronde tafelconferentie novèmber 2005 pa kombiná e trayekto finansiero i di struktura estatal, anto awor direpente nan ta kambia di opinion. Hasta e akuerdo aki a keda ratifiká dor di tur partido polítiko den Konseho insular. Ku e kambio di posishon aki por konkluí ku e partidonan aki a pèrdè strea di nort i ta buska sosten di partidonan di paisnan independiente pa yuda nan deseo di independensha bou di kapa di Kòrsou outónomo. Nan no tin niun argumentashon rashonal pa hustifiká e motibu di ta kontra e deklarashon final. Pueblo di Kòrsou a skohe na aprel 2005 den referèndem pa un status outónomo den reino, no pa independensia.

 

Pagamentu di gastunan e.o di estadia pa COPPPAL ta nada mas ku un abusu di marka mayor ku plaka di pueblo pa finnan netamente polítiko. Frakshon di PAR a tuma nota ku kada bes BC tin e  kustumber di usa plaka di pueblo pa paga pa aktividatnan polítiko. Frakshon di PAR ta ansioso pa sa kuantu sèn e pachanga di polítikonan progresivo den region aki a kosta nos. Sènnan di CTB mester wòrdu usa pa desaroyo turístiko.

 

Pa risibí mas klaridat Remco Gomez, representante di Pueblo den Konseho Insular a hasi uso di artíkulo 37 di RVO pa hasi e siguiente preguntanan na BC:

1. BC por a informá Eilandsraad ku ta bèrdat ku CTB a paga pa e gastunan di COPPAL?
   
   
2. BC por informá ku statutonan di CTB ta permití pa kubri gastunan di un organisashon polítiko internashonal?
   
   
3. Kuantu e gastunan pa CTB ta ?
   
   
4. BC por a spesifiká e gastunan kubri dor di CTB ?
   
   
5. BC por a informá Eilandsraad ku ta un maneho nobo tin enkuanto di finansiamentu di aktividatnan polítiko ku fondo públiko ?
   
   
6. BC ta para tras di e posishon di COPPPAL pa denunsia Hulanda paso esaki a kombiná e trayekto finansiero na esun di struktura estatal konforme desishon di start-ronde tafel Conferentie di novèmber 2005? BC ta kontra di e desishon tuma na novèmber 2005 pa kombiná e trayekto finansiero na esun di struktura estatal ?
   
   
7. BC por a manda un kopia di e resolushon di COPPPAL pa Eilandsraad ?