Ya tin algun siman ku mas ku shen trahadó a tene un wèlga durante ora di trabou i kaminda nan a duna di konosé ku tin diferente iregularidatnan ta tumando lugá den e ofisinanan menshoná.
P’esei frakshon di PAR den Konseho Insular a pidi pa laga SOAB hasi un “Quick Scan” riba tèrmino korto pa determiná si esei realmente ta e kaso.
For di dia ku e gobièrnu aktual a sinta den dezèmber último e desaroyonan ku a bin ta tuma lugá a destabilisá e servisio enormemente, pa motibu di desishonnan ku a keda tumá dor di e Bestuurscollege di FOL. Frakshon di PAR a skucha un grupo di e trahadónan dos siman pasá kaminda nan a splika ku riba diferente tereno tin desaroyonan no deseá ta tumando lugá. Komo ehèmpel nan a trese dilanti e kambio drástiko i no argumentá den e plan di alohamentu di trahadónan, siendo tabata kanando un trayekto diferente pa akomodá trahadónan.
Den nan bista e alohamentu nobo ta nesesario di moda ku nan por duna mas i mihó servisio na komunidat. Tambe e trahadónan a mustra e.o. riba ampliashon di e aparato di DWI den sentido ku ta nombrando diferente persona sin ku tin vakatura i sin ku tin trabou i tampoko akomodashon pa nan. Alabes e trahadónan a para ketu na nombramentunan sin ku e personanan ta kumpli ku e eksigenshanan pa hasi e trabou di un forma ku komunidat por haña e servisio optimal.
Finalmente tambe nan a mustra riba nan preokupashon pa ku postulashon di personanan den skalnan muchu mas haltu ku nan kualifikashonnan. E trahadónan a ventilá nan preokupashon i nan a ekspresá nan deseo pa haña klaridat riba e maneho ku diputado Jacintha Constancia ke hiba riba tereno sosial. Alabes nan a enfatisá ku nan no ke pa e diputado konserní obligá nan di kometé aktonan iresponsabel i muchu ménos ilegal.
Frakshon di PAR a duna di konosé for di promé instante ku e ta sostené i ta kompartí e opinion di e trahadónan totalmente, ku mester bini ku un maneho kla pa tur hende sa e direkshon. Tambe frakshon di PAR ta sostené e ponenshanan ku no por obligá ningun trahadó di aktua iresponsabel i tampoko kometé aktonan ilegal.
Pa frena i evitá kualke situashon indeseá, frakshon di PAR den Konseho Insular a hasi un apelashon serio na Bestuurscollege pa laga e fundashon di gobièrnu SOAB hasi un investigashon relámpago, un asina yamá “Quick Scan”, pa detektá si tin aktonan iregular ta tumando lugá den DWI i informá Konseho Insular di e resultado. Bestuurscollege na su turno a ninga un “Quick Scan” redondamente, alehando ku tur kos ta tumando lugá den kuadro di lei.
E forma den kua a trata e petishon di frakshon di PAR aki ta mustra semehansa ku e kaso anterior di dalmentu di outo di gobièrnu, kaminda un i tur por kòrda bibu bibu kon Diputado Jacintha Constancia a lansa un mentira di marka mayor, pa despues di hopi preshon for di komunidat, atmití ku e la kometé un akto ilegal.
Nubia skur ta menasá Kòrsou
Den e kaso di e problemanan ku tin na ofisinanan di Ban Bario Bèk ta bolbe krea e impreshon ku tur kos ta kanando den kuadro di lei, siendo ku trahadónan a duna bon kla di konosé ku esei no ta e kaso.
E pregunta kardinal ta: tin un Ban Bario Bèk-gate ta vislumbrando na horizonte? Frakshon di PAR en todo kaso lo sigui vigilá e proseso na Ban Bario Bek i ya a alertá diputado Jacintha Constancia ku barbulètè ku ta keda hunga na lampi ta bolbe kima su alanan.
