 Pedro Atacho Djis komo introdukshon: Parlatino no ta bai kontra di un pais miembro ku a aprobá slotverklaring
E Conferencia Permanente Partidos Político de America Latina (COPPPAL) a keda di denunsia Ulanda serka Parlamento Latino Americano (Parlatino) pa aktonan di rekolonisashon dor di mara e solushon di debe nashonal na e trayekto di struktura estatal.
Aparentemente MAN, Forsa Kòrsou, FOL i PLKP a lubidá ku den e Konferensha di Mesa Rondó na novèmber 2005 paisnan den Reino Ulandes inkluso teritorionan insular a aprobá ku e trayekto di struktura estatal i sanashon di debe lo kana huntu.
Kon un organisashon polítiko internashonal por denunsia Hulanda tanten ku e paisnan den Reino Ulandes inkluso Kòrsou a bai di akuerdo pa e dos trayektonan di struktura estatal i sanashon di debe kana pareu? Kon partidonan MAN, Forsa Kòrsou, FOL i PLKP por fèrwagt ku Parlatino ta entrega un denunsia na Nashonnan Uni i Komunidat Europeo tanten ku Parlamento di Antia a aprobá e slotverklaring di 2 novèmber 2006 pa medio di un moshon fechá 14 dezèmber 2006. Parlatino lo no bai Nashonnan Uni kontra di un di su miembronan. Ademas kon Parlatino por bai kontra di un trayekto ku tur partner den Reino Ulandes inkluso Kòrsou a bai di akuerdo ku ne.? COPPPAL no ta miembro di Nashonnan Uni i no por denunsia Ulanda sin ku nan haña un pais pa hasi esei pa nan. No ta probabel ku nan lo haña tal pais riba tèrmino kòrtiku, sigur kaminda ku Reino Ulandes ta mantené un bon relashon diplomátiko i ayudo di koperashon ku paisnan den nos region. Si COPPPAL tabata serio den su intentonan pa denunsia Ulanda lo e organismo mester a reuní aparte di Bestuurscollege di Kòrsou tambe ku Gobièrnu Antiano i Representashon di Ulanda na Willemstad.  Vota PAR! Willemstad, 22 di mart 2007.
Pedro Atacho
Lider di Frakshon di PAR
Tel:5217676 |
