Página prinsipal
|
MAN ta uza Sèn di Pueblo pa Paga Propaganda Polítiko |
|
Wednesday, 07 March 2007 |
 Remco Gomez Resientemente pueblo di Kòrsou por a tuma nota di un programa semanal na televishon den kual e diputado di infrastruktura (Charles Cooper) ta presentá tur e proyektonan aktual ku tin di haber ku infrastruktura. Frakshon di PAR a bin diskubrí ku diputado Cooper ta paga pa e programanan aki ku sèn di pueblo, via di Stichting Wegenfonds Curaçao (SWC).
Ta parse ku diputado aki a bira ta hasi un kustumber pa uza plaka di pueblo pa broma ku “su logronan”. Aña pasá el a hasi mes kos den tempu di kampaña. Hasimentu di propaganda polítiko ku plaka di pueblo no ta nada nobo pa e aktual Bestuurscollege (BC) forma pa e partidonan FOL, MAN, MSL i NPA. Diputado Charles Cooper no ke keda niun paso atras di su kolega diputado Nelson Pierre. Pierre ta responsabel pa e programa di televishon “Transparensia”(ki ironia!) pagá ku plaka di pueblo via di STIP. PAR ta e partido responsabel pa kreashon di Stichting Wegenfonds Curaçao. Meta prinsipal di SWC ta pa atministrá i suministrá fondo pa konstrukshon i mantenshon di nos kamindanan públiko. SWC ta haña su kapital for di belasting di number di outo (motorrijtuigbelasting). Huntu ku DOW fundashon SWC ta planeá kua parti di infrastruktura di tráfiko ta bai haña atenshon. E trabounan ta inkluí mantenshon di kaya eksistente, konstrukshon di kaya nobo i ponementu i mantenshon di lus, bòrchi i otro mobilario di kaya. Frakshon di PAR den Konseho Insular di Kòrsou ta sumamente preokupá ku e estado di hopi di nos kareteranan. Tin hopi buraku ku ta kousa daño na vehíkulo i tambe situashonnan peligroso den tráfiko. P’esei ta straña nos frakshon ku ta uza e fondonan pa propósito ku no ta aprobá. E programa di televishon kaminda diputado ta broma ku su logronan no ta kai den e metanan di SWC segun statutonan. Pa haña mas klaridat riba e punto aki, Miembro di Konseho Insular Remco Gomez a hasi uso di artíkulo 38 di RVO pa hasi e siguiente preguntanan na BC: BC por a informá Konseho Insular na unda e sèn pa e programa di televishonnan aki ta presupuestá?
BC por a informá Konseho Insular sita e fondo di SWC ta paga pa e programa di televishon menshoná?
BC por a informá Konseho Insular kuantu sèn e programanan aki ta kosta?
BC por a manda planning di aña 2007 i 2008 enkuanto konstrukshon i mantenshon di kareteranan públiko pa Konseho Insular?
BC por a informá Konseho Insular kuantu sèn mester pa realisá un inhaalslag di nos kareteranan públiko?
 BC por a informá Konseho Insular kua kayanan ta primaire, secundaire of tertaire wegen? BC por a informá Konseho Insular kon e fondonan pa asfaltá ta wòrdu repartí entre e primaire, secundaire of tertaire wegen?
Ta BC kompleto ta para tras di e kontenido di e programanan aki?
|
|
|
