Tin proposishon di lei kla kaba fo’i 2003 pa nos grandinan riba 60 aña keda sigurá na SVB.

 

Frakshon di PAR a manda karta na diferente okashon pa ministernan enkargá ku salubridat di turno mustrando ku nos frakshon tin hopi preokupashon pa nos grandinan su salú i bienestar. Un kantidat grandi di persona ta aserka nos frakshon ku e petishon ku nan kier keda sigurá na SVB na momento ku nan alkansá e edat di 60 aña.

For di 2003-2004 tin un proposishon di lei prepará pa e mesun SVB ku a keda entrega na ex-Minister di Salubridat Públiko sra. Theodora-Brewster kual a keda pega den aparato públiko te dia di awe. Nos frakshon a manda diferente karta pa ex-minister Sandra Smith i sra. Minister Delannooy (11 di aprel 2006, 4 sèptèmber 2006, 9 òktober 2006 i 5 febrüari 2007) pidiendo atenshon pa e problema i pa gobièrnu sòru pa e proyekto di lei yega Staten pa asina nos por aprobá e lei i solushoná e problema di nos grandinan ku ta kai for di e seguro di SVB na momento ku nan hasi 60 aña.

Ta lógiko ku e situashon aki ta kousando bastante iritashon serka esnan envolví ya ku nan ta di opinion ku hinter nan karera komo trahadónan nan a paga 2.1% di prima di seguro di malesa i awor ku nan mester di seguro nan ta keda retirá na edat di 60 aña. Pa esnan ku tin entrada riba fl. 1500,- -ku no ta bin na remarke pa un karchi di PP- un seguro serka un kompania priva ta algu impagabel. Ademas kuido médiko ta karu i sigur nos grandinan mester hasi regularmente kòntròl serka dòkter di kas, speshalistanan, hasi tèst na hospital i laboratorio.

Nos grandinan no por sigui warda mas i no meresé e trato aki. Por lo tantu nos ta pidi sra. Minister enkaresidamente pa entrega e proyekto di lei enkuanto seguro di malesa pa nos grandinan riba 60 aña den dos siman di tempu. Athunto bo ta risibí un proposishon di lei. Den kaso ku e entrega no tuma lugá, Frakshon di PAR lo tuma e proposishon over i lo entrega esaki komo inisiativa di lei i lo aserka tambe frakshonnan den Parlamento pa sostené esaki.



Jacqueline Spencer
Miembro di PAR den Parlamento di Antia.