Ku frekuensha por tende ku for di añanan 69 tempu ku partido Demokrat tabata na mando, ku ta e partido ku a introdusí gran parti di e leinan soshal ku nos tin awendia, no a bini ku nada nobo.

 

Ta opvio ku esnan ku ta bisa esaki, sea no ta sufisientemente na altura di kiko gobièrnunan di PAR a hasi, òf konsientemente ta trata na krea un persepshon diferente. Si mester pone tur e loke partido PAR a hasi, no por keda sin yega na e konklushon ku gobièrnunan di PAR tabata i ta un di esnan di mas sosial di tur tempu.

 

At’akí algun di e hechonan:

1. Ta gobièrnunan di PAR, en todo kaso a sòru pa nos florin keda un florin, sino awe prinsipalmente esnan ménos pudiente lo tabata den problema serio. Si no ta pa gobièrnunan di PAR, masha dia nos lo a konosé un kolapso finansiero/ekonomiko total;
   
   
2. Ta gobièrnu di PAR, enkabesá pa Miguel Pourier, a introdusí Lei di Labizjan, ku  a hasi ku tur suidadano awe ta sigurá kontra malesanan króniko;
   
   
3. Ta gobièrnu di PAR, enkabesá pa Miguel Pourier, a introdusí e lei riba seguro di famia, ku a hasi posibel ku famia (30,000 hende) di tur trahadó sigurá na SVB tambe por gosa di kuido médiko;
   
   
4. Ta gobièrnu di PAR, enkabesá pa Miguel Pourier, a sòru pa independisashon di e hende muhé bou di e areglo di Penshun di behes. Ku otro palabra e hende muhé por a haña su propio penshun di behes;
   
   
5. Ta gobièrnu di PAR, enkabesá pa Miguel Pourier, a sòru pa atraves di SOFNA traha 600 kas di pueblo èkstra, los for di esnan regular di FKP. Esaki a sòru pa un mínimo di 2400 hende por a haña un dak riba nan kabes;
   
   
6. Ta gobièrnu di PAR, enkabesá pa Miguel Pourier, a sòru pa a bini ku Reda Sosial ku a gasta 85 mion rònt Antia na proyektonan pa drecha bario, proyektonan di formashon, proyektonan di kuido, i proyektonan ekonómiko;
   
   
7. Ta gobièrnu di PAR, enkabesá pa Etienne Ys, a sòru pa sigui ku e trabou di drecha barionan;|
   
   
8. Ta gobièrnu di PAR, enkabesá pa Etienne Ys, a sòru pa Hulanda a finansiá e estudio integral di pobresa ku ta wòrdu ehekutá pa Worldbank/UNDP;
   
   
9. Ta gobièrnu di PAR, enkabesá pa Etienne Ys, a sòru pa FKP a introdusí un areglo kaminda hende por haña un fiansa pa por drecha nan kas, kaminda 2000 florin ta pòrnada;
   
   
10. Ta gobièrnu di PAR, enkabesá pa Etienne Ys, a sòru pa kobradó di penshun di behes ku no tin ningun otro entrada adishonal, ku nan ta bai haña 100 florin èkstra pa luna;
    
    
11. Ta gobièrnu di PAR, enkabesá pa Etienne Ys, a sòru pa despues di dékadanan largu (ta 25 aña pasa bou di gobièrnu di Demokrat a lansa e idea di un brigada di desaroyo) di deskuido di nos hóbennan, ku a introdusí e lei riba Formashon soshal Obligatorio, ku ta hasi posibel ku tur hóben dropout entre 16 pa 24 aña, por haña un di dos oportunidat pa haña un edukashon.

Partido PAR ta kere ku e pueblo aki meresé muchu mas, i lo por a haña mas si no ta pa e situashon finansiero/ekonomiko pésimo ku nos ta den. Pero asina mes mi ta riska di bisa ku ningun otro partido den e último dékadanan no por mira bek riba un "track record" dje impreshonante aki riba tereno sosial.