 Mike Willem Hopi promesa tabatin di parti di e BC (MAN, LNPA, FOL, i MSL) aktual pa ku sierto asuntunan di importansha transendental. Entre nan ta figura prominentemente e promesa di un alternativa pa remplasá e slotverklaring. Ta importante den esaki pa tene den mente ku e alternativa riba e slotverklaring aki, konkretamente mester enserá alternativa no solamente pa ku un struktura estatal nobo, pero tambe solushon pa e problema di debe, solushon pa esaki no por ripití mas den futuro, solushon pa e invershonnan nesesario den enseñansa, solushon pa ku insentivonan finansiero pa boost nos ekonomia, i solushon pa finansiamentu di e retraso sosial. Pa no papia mes di otro asuntunan ku tambe a keda akordá mas tempran den e trayekto.
Ta hasi mas òf ménos 6 luna ku e grupo di 13 a rechasá e slotverklaring. Te ku awe ainda henter komunidat, tantu esnan pro komo esnan kontra, ta pendiente di un alternativa real. A primintí di instalá dos grupo di trabou ku lo a bai traha riba esaki. Un di nan, esun ku tin di bin ku alternativa pa ku struktura estatal mes, no a ni mira lus di dia ainda. I e otro ku mester bini ku alternativa pa ku solushon di e debe, a duna di konosé ku nan no por a keda kla pa medio di mart, i ku nan tin mester di tempu te ku medio Aprel.  Kiko e grupo último aki lo bin ku n’e ta un interogatorio grandi, ya ku entre tantu tur posibel alternativa ku a wòrdu menshoná òf proponé pa partidonan kontra e slotverklaring, a resultá di no ta realista. E debe di gobièrnu sentral ta di e islanan, i no di Hulanda; refinansiamentu no solamente ta dependé di konfiansa, pero no ta nada otro ku posponementu di kos; i finalmente benta lo no trese masha sèn den lachi pa redusí debe, pa no papia mes di ken ke kumpra nos kompanianan di gobièrnu bou di e sirkunstanshanan aktual. Ku otro palabra no tin miho alternativa, riba un regalo. Pues te ku awe nos a tende papiamentu tokante di struktura i di debe so, i nada di e sobra asuntunan ku a keda palabra. Esei ta nifiká ku e chèns ta grandi ku ora medio aprel yega, lo no tin nada riba mesa ku ta remplasá e totalidat di e palabrashonnan ku nos a hasi den henter e trayekto di struktura estatal.
Esei ta nifiká ku e BC aki, lo no tin nada pa mustra pueblo. I den e situashonnan aki, manera ya nos ta kustumbrá di sierto di e polítikonan aki, dos kos ta posibel. - Sea nan lo sigui kore e kabai di sigui fomentá desunion i rabia den komunidat, pa asina sigui krea un ambiente konfuso,
OF
- Lo bini ku kualke kuenta di hada (sprookje) den porta di elekshon, pa asina benta santu den wowo di e elektorado.
Pueblo di Kòrsou, OJO! |
