Esnan kontra di slotverklaring te dia di awe no a produsí un plan alternativa ku ta inkluí tur bentaha enserá den slotverklaring. Pero esei no ta stroba nan di basha krítika, hopi biaha sin base.

Un punto ku nan ta insistí riba dje ta: Hulanda no a kumpli ku Miguel Pourier. Di kon ta kere ku awor ku ta trata di slotverklaring, si nan lo kumpli?

Na añanan nobenta Minister President Pourier a bai di akuerdo pa na sana e situashon malu ku nos pais tabata den. Hulanda a primintí yudansa pero a pone komo kondishon ku nos mester traha ku IMF pa remediá e situashon finansiero promé.

Tur loke ku ta por a hasi a hasi pa kumpli. Tabata falta Nafl.150 mion di yudansa pa por a kaba e trayekto. Sinembargo Hulanda no a manda e último parti di e sèn pa motibu ku Minister Gijs de Vries a haña ku e islanan no a kumpli ku tur kondishon. Entre otro no a logra bende ALM.

E yudansa Hulandes ku no a yega nunka tabata un sla duru di bèrdè mes. Esaki a pone ku un deskonfiansa grandi a lanta den pueblo pa tur loke ku ta trata kumplimentu di Hulanda. Esaki ta komprendibel.

Pero den e kaso di slotverklaring di dia 2 novèmber 2006, ta trata un otro asuntu.

Aki ta trata un montante hopi grandi di miar di florin. Ademas e loke a palabrá aki ta algu ku e Minister Presidente di Hulanda, huntu ku e otro minister presidèntnan den Reino a palabrá den Konferensha di mesa rondó, esta un palabrashon entre gobièrnunan!

Ademas ta asina ku promesa aki a keda tratá tambe den Tweede Kamer, esta parlamentu Hulandes. E komishon finansiero ku tin basta tempu trahando kontinuamente ta haña informashon di e palabrashonnan di tur e gobièrnunan. E komishon ta konsistí di peritonan di Hulanda tambe.

Minister di Finansa di Antia, huntu ku minister di Finansa Hulandes i diputadonan di Finansa i Struktura Estatal di Kòrsou i Sint Maarten, tur ta vigilá e palabrashonnan kontinuamente.

Komo ku e biaha Hulanda ta parti di e implementashon ta imposibel pa nan keda sin kumpli. No tin duda riba esaki, speshalmente ora nos mira kon Hulanda a kumpli ku su promesa i a kuminsá duna e isla chikitunan e alivio for di awor dor di tuma 1 miar di debe di nan over. Esaki a sosodé na e kumbre ku tabatin dia 12 febrüari 2007 na St.Maarten.