Esnan kontra di slotverklaring te dia di awe no a produsí un plan alternativa ku ta inkluí tur bentaha enserá den slotverklaring. Pero esei no ta stroba nan di basha krítika, hopi biaha sin base.

Un punto ku nan ta insistí riba dje ta: "Si nos firma slotverklaring nos ta bira kolonia hulandes atrobe!"

 

Ora un pais ta un kolonia, esei ta nifiká, ku su mes hendenan no tin nada di bisa. Ta e pais ku ta kolonisadó ta disidí, hasi i deshasí. Nos no por bira kolonia bek!

Promé ku Doktor da Costa Gomez i Fijn Jonckheer a firma Statüt pa Antia bira parti igual den Reino na 1954, e islanan ku ta forma parti di Antia awor aki tabata kolonia hulandes

For di firmamentu di Statüt, Hulanda a skohe pa duna pueblo antiano, mas outonomia pa nan mes regla nan asuntunan interno. A kumbiní ku asuntunan di Reino lo a keda reglá konhuntamente.

E akuerdonan hasí ku a pone den e slotverklaring di dia 2 di novèmber, di ningun manera por hasi nos kolonia bèk. Loke ku tin den Statüt den artíkulo 3 ta menshoná e asuntunan ku Reino ta regla pa nos. Nan ta :

1. nos nashonalidat hulandes,
   
   
2. defensa di nos pueblo. Dios mester libra pero si a kaso tin guera, Reino lo sòru pa defendé nos.
   
   
3. relashonnan eksterior. Es desir, tur loke ta e relashon ku otro pais ta un asuntu di Reino.
   
   
4. reglamentu di atmishon i “uitzetting” di ekstranhero i hulandes
   
   
5. reglamentu di registrashon di barku.

Si firma e slotverklaring ningun di e puntonan aki ta kambia. E islanan ta keda ku outoridat pa atendé tur asuntu meskos ku Antia ta hasi awor. No ta kita nada for di nan.

Nunka mas e islanan por bira kolonia bèk. Meskos ku e otro islanan Kòrsou ta keda forma parti di Reino Hulandes, segun deseo ekspresá pa pueblo den e último referèndem.

 

Lesa mas kuenta di hada aki . . .