Esnan kontra di slotverklaring te dia di awe no a produsí un plan alternativa ku ta inkluí tur bentaha enserá den slotverklaring. Pero esei no ta stroba nan di basha krítika, hopi biaha sin base.

Pueblo a vota pa un Kòrsou outónomo den Reino. Esaki ta nifiká ku Pais Kòrsou lo bira un Pais den Reino meskos ku awor aki bo tin Pais Ulanda i Pais Aruba.

Den nos situashon for di 1986, dia ku Aruba a haña su status outónomo, Antia ta konsistí di sinku isla: Kòrsou, Boneiru, Saba, Statia i St.Maarten. Gobièrnu sentral antiano ta sirbi e islanan riba diferente área, inkluso hustisia. Ademas, kada isla tin su gobernashon lokal riba e isla mes.

E struktura di Reino Hulandes aktual:

Den Parlamentu di Antia ta trata tur e kasonan i leinan ku ta regardá tur e islanan huntu. Den Parlamento di Antia tin representantenan (parlamentario) di tur isla. Ora e parlamentarionan pasa un lei den Parlamento di Antia, e lei ta konta pa tur isla.

A kumbiní den slotverklaring ku Antia lo stòp di eksistí. Hulanda lo mester bai atendé direktamente ku e tres islanan mas chikitu, ku ta Bonaire, Saba i Statia.

Kòrsou i St. Maarten ta bira pais outónomo den Reino, meskos ku Aruba. Nan lo bai atendé nan propio asuntunan.

Si akaso Hulanda mester di yudansa pa un di e islanan chikí , nan lo por haña esaki pagando Kòrsou òf St. Maarten pa e servisio duna.

Ya ku Antia lo stòp di eksistí no por papia di un Antia restrukturá. Loke si a restrukturá ta Reino Hulandes.