Ku brasamentu di rapòrt Monte, MAN ta na fabor di medida i peligrá penshun di yunan di tera.

Dikon ? E motibu pa esaki ta simpel. Esnan ku a brasa e rapòrt integralmente, den nan afan pa a todo kosto haña algu pa remplasá e aspekto finansiero di e slotverklaring, a mustra e otro kara di nan. E otro kara aki ta esun di oportunista. Oportunista,  paso ku e rapòrt aki, nan a duna muestra ku nan no ta konsekuente den e loke nan ta prediká.

 

Partido MAN ta parti di e grupo di partido – i otro gruponan nan polítiko aki, ku tur ora tin nan boka yen di e dicho popular di “hende ta sentral”, pero ku den e kaso di e rapòrt aki a pèrdè esaki kompletamente for di bista.

Mas bien ta e partido su interes ta sentral, i no e hende. E motibu pa kual mi ta bisa esaki, ta pa lo siguiente:

1. Si e  hende ta sentral, anto nunka por t’asina ku konsientemente ta peligrá penshun di e yunan di tera. Paso ta esaki ta e resultado ora bo tuma e posishon ku e debe di gobièrnu sentral no ta di e islanan, entre nan Kòrsou. Gran parti di e debe aki ta den forma di bono. Bono ku ta wòrdu kumpra pa un Apna, fondonan di penshun priva, kompanianan di seguro di bida, i individuonan atraves di banko, pa asina asegurá e penshon di vários hende den e komunidat aki.
   
   For di e ámtenar, e trahadó den sektor priva, te ku e individuo ku a disidí di e mes take care di su penshun. Ku e posishon aki, tur areglo di penshun (inkluso AOV) ku a invertí den bono di gobièrnu sentral ta na peliger. Ta asina simpel e asuntu aki ta.
   
   
2. Si e hende ta sentral, anto nunka no por t’asina  ku ta brasa un alternativa ku pa definishon ta trese ku n’e medida. No solamente medidanan ya menshoná den e rapòrt, manera redukshon di e kantidat di ámtenarnan. Pero tambe medida ta bai bira nesesario pa dos motibu:.

• E promé ta pa motibu ku e proposishonnan den e rapòrt, ta entre otro iresponsabel, i no ta realisabel riba tèrmino korto. Pa no papia mes di e interogatorio rondó di e efektonan ku nan lo surti. Esaki lo trese ku n’e ku nunka e défisit aktual di 90 mion, lo por keda di bòltu den un surplus signifikativo manera e rapòrt ta pretendé.
  
  
• E di dos ta pa motibu, ku Pais Kòrsou lo heredá parti supstansial di e défisit di 150 mion di Antia, hasiendo asina e défisit di Pais Kòrsou aun mas grandi. I por lo tantu muchu mas na medida ta nesesario pa logra un surplus riba presupuesto.

Pues basa riba e loke a keda splika, mester konkluí ku ta hustamente organisashonnan manera e.o. partido MAN, ta esnan ku ta berdaderamente asosial, kruel i inhumano, paso no ta interesá nan un bledu e yu’i di tera su penshun, ni tampoko e hecho ku mas medida ta na kaminda.

 

Tambe a bira opvio ku e organisashon i partidonan aki tambe tin un banda di kara neo-liberal, pero ku esaki ta wòrdu mustra ora ta kumbiní. Pues e ora a yega pa para MAN i e otronan ku ta para pa un rapòrt ku tin komo konsekuensha medida, i falta di sentido di responsabilidat pa ku e seguridat di e penshun di e yu’i di Kòrsou.