Frakshon di PAR den Parlamento a tuma nota di un diskushon den komunidat den sentido ku matrimonio entre personanan di mesun sekso lo bira posibel na Kòrsou pa motibu di e Deklarashon Final (Slotverklaring) ku a keda firma na Hulanda.

Ta bon pa aklará lo siguiente:

1. E deklarashon final ku a keda firma na Hulanda i ku a keda rechasá pa Konseho Insular di Kòrsou no tin nada di haber ku matrimonio entre personanan di mesun sekso. E deklarashon final ta un dokumento ku ta atendé konklushonnan riba asuntunan finansiero i di hustisia. Den e Deklarashon Final no tin nada skibi riba kambiamentu di nos Kódigo Sivil.
   
   
2. E institushon di matrimonio na Antia Ulandes ta regla entre otro den artíkulo 31 di nos Kódigo Sivil i ta bisa klaramente ku “Un matrimonio por wòrdu sera entre un hòmber i un muhé”. Kada pais outónomo den Reino tin su propio Kódigo Sivil teniendo kuenta ku norma i balornan ku ta eksistí den e diferente partinan den Reino. Artíkulo 39 di nos Statüt ta preskribí entre otro ku e Kódigo Sivil ta “konkordante” o sea ku e Kódigonan Sivil den Reino Hulandes mester ta similar ku otro i no mesun kos. Den esaki klaramente ta duna espasio na e paisnan outónomo pa regla nan Kódigo Sivil teniendo kuenta ku nan norma i balor. Ta p’esei nos Kódigo Sivil ta un “Landsverordening” (Lei di pais) i no un lei di Reino. Dia ku Kòrsou atkirí e status di pais outónomo den Reino manera un mayoria di pueblo a disidí den Referèndem, e ora ei Kòrsou ta tuma e Kódigo Sivil di Antia over di manera ku e institushon di matrimonio ta keda regla meskos ku awor aki.
   
   
3. E fenómeno di matrimonio entre personanan di mesun sekso ta tuma lugá den sierto paisnan na mundu manera Hulanda, Spaña, Bèlgika, Sur Afrika i Canada. E gran mayoria di paisnan na mundu inkluso Union Europeo no ta rekonosé matrimonio di mesun sekso. Meskos ku nos ta respetá norma i balornan di otro paisnan nos mester sali for di e punto di bista ku otronan inkluso Hulanda ta respetá nos posishon.
   
   
4. Kòrsou ta un gran pais kaminda nos ta respetá tur persona di diferente desendensha, religion i tambe orientashon seksual. E punto di salida krusial ta ku un i tur ta biba riba e baranka aki ku rèspèt pa nos norma i balornan. Kier men si un barku di turista drenta nos haf ku personanan di un otro orientashon seksual nos mester realisá ku nan ta hende meskos ku nos. E kos importante ta ku nan tin di kumpli meskos ku nos tambe na nos normanan i balornan.

Ku esaki frakshon di PAR kier a duna un aporte pa kita kualke mal interpretashon sigur di kontrinkantenan polítiko ku kier bruha pueblo mustrando ku matrimonio entre personanan di mesun sekso ta bai bira posibel na Kòrsou ku e deklarashon final.