Vota PAR!
E deklarashon final, ‘slotverklaring’, a lanta hopi diskushon den komunidat. Esei ta un señal ku komunidat ta duna hopi balor na un futuro estatal nobo. At’akí algun kontesta kla riba pregunta kritiko frekuentemente hasí
Hulanda no mester ehekutá nos futuro estatal nobo manera nos ke?
Solamente ora un pais bira independiente, e ta lòs su mes kompletamente for di e pais mama. E ora ei so e por fiha su struktura estatal nobo sin tene kuenta ku e pais mama. E islanan di Antia a skohe pa eliminá Antia, pero keda forma parti di Reino Hulandes. Esaki tin konsekuensia riba vários tereno; no pa e islanan so, pero pa Hulanda tambe. P’esei tur isla i Hulanda mester kumbiní kon nan ta sigui ku otro despues ku Kòrsou bira outónomo den Reino.
Boletin di referendum 2005 no a splika kaba kiko e konsekuensianan ta?
Ata algun sita for di Boletin di referendum number 2 (esun mas ekstenso):
- “E di dos boletin akí ta trata e posibel konsekuensianan di kada opshon.”
- "En parte, e konsekuensianan akí ta dependé di negosashonnanku mester tuma lugá despues di referendum ku e partnernan den Reino.”
- “Kòrsou mester kaba di fiha kontenido eksakto di e státus outónomo. Te kaminda ta rasonabel, Hulanda mester ehekutá esaki.”
- “Kòrsou por kumbiní ku un òf mas di e islanan pa hasi sierto tarea huntu.
- “Un státus outónomo pa Kòrsou no ta ekskluí un union monetario i ekonómiko entre e islanan. Den e kaso ei e islanan mester koordiná nan maneho riba e terenonan akí ku otro.”
Hulanda por usa nos doló finansiero pa eksihí kondishon?
E islanan di Antia a konstatá na novèmber 2005 (Start-Konferensia di Mesa Rondó) ku e magnitut di debenan ta stroba nan di realisá un státus estatal nobo. E islanan a pidi Hulanda pa yuda sanea nan finansa. Solamente asina nan por duna kontenido realístiko na nan státus estatal nobo. E islanan a akordá ku nan pueblo tin derechi riba un situashon finansiero sano, ku ta keda sano tambe. P’esei ta nesesario pa sigurá ku e fayonan no ta ripití nan mes. Esei no ta enserá kòntròl finansiero so. Hulanda a komprometé su mes den ‘slotverklaring’ tambe pa yuda reforsá e base sosial, ekonómiko i finansiero di Kòrsou.
Pakiko Hulanda ta fiha riba nos organisashon hudisial?
Reino Hulandes ta garantisá seguridat hurídiko konforme Statuut. Kriminalidat den siglo 21, espesialmente droga, terorismo, transporte di hende i otro ilegalidat, a haña un karakter internashonal. Kòrsou ta mihó protehá si e tin formanan di koperashon formal i struktural ku e otro islanan i si su organisashon hudisial ta ankrá den leinan mas haltu den Reino.
Pakiko sigui traha ku otro isla, si a skohe pa bira outónomo den Reino?
For di den reunion kumbre na mart 2006, Kòrsou i Sint Maarten a akordá ku nan lo traha huntu riba sierto tereno. Traha huntu no ta kita for di e státus outónomo di Kòrsou. Komo pais outónomo den Reino Kòrsou ta partner direkto di Hulanda den Reino i niun otro isla no tin influensha mas riba parlamento ni gobièrnu di Kòrsou.
Pakiko Kòrsou no a haña presis mes status ku Aruba?
Pregunta? Djis puntra PAR pa bo sa!
Tempu ku Aruba a haña Status Aparte, e mester a bai di akuerdo ku un areglo di koperashon ku pais Antia riba diferente tereno. Awor ku ta disolvé Antia, pais Kòrsou ta drenta den areglo di koperashon pa e otro islanan. Ademas Aruba a regla diferente asuntu den protokòl ku Hulanda, miéntras Kòrsou ta regla nan den ‘consensus-Rijkswet’ .
Tokante Slotverklaring 