Kiko ta mas importante pa BC aktual: mantené kantor òf kombatí pobresa?

Miembro di Konseho Insular pa partido PAR, sr. Eugene Rhuggenaath a dirigí un karta na Gezaghebber den su kalidat di presidente dje kolegio ehekutivo (BC), kuestionando e intenshonnan pa renobá e kontrakt di hür ku “Jashi”.  Esaki den kuadro di prioridat ku ta duna kombatimentu di pobresa.

 

Segun sifranan optené di gerensia Fondo Sosial pa Kombatí Pobresa (FSKP), e fondo ta paga 18.400 florin na hür pa luna. Riba esaki tin un obligashon pa paga 22.000 florin na gastunan adishonal pa hasi uso di e edifisio (asina yamá “servicekosten”). Pues 40.400 florin pa luna na edifisio so pa ubiká 12 empleado.

 

Agregando otro gastunan operashonal manera salario (41.400), premionan sosial (5.800), utilidat (3.000), gastunan no premirá (5.000) etc, un total di 95% di e presupuesto mensual disponibel ta bai na gastu fiho. Pues, FSKP ta sobra únikamente 5% di nan presupuesto pa kombatí pobresa.

Ku otro palabra di kada florin ku FSKP ta disponé di dje, 5 sèn so ta bai pa e hòmber chikí, miéntras 39 sèn ta bai pa yena saku di Jashi. Pa aña 2006 esei a nifiká ku 62.500 florin a bai pa nos hendenan marginá di un presupuesto di 1.25 mion florin, miéntras 485.000 florin a bai pa doño di edifisio Jashi. Esaki den tur sentido i bou di tur konsepto ta un bagamunderia di marka mayó.

 

Den pasado ya kaba frakshon di PAR a atvertí ku e struktura ku FOL a skohe pa instituí FSKP lo a trese gastunan operashonal (“overhead”) demasiado haltu kuné. Awe e konsekuensha ta bisto: muchu poko sèn ta keda disponibel pa kombatí pobresa, ku final di kuenta ta e meta di e fondo.

 

 

 

Na vários okashon a sugerí pa hasi uso di institutonan eksistente manera DWI, Korpodeko, Adeck/Sedeck i UNA pa utilisá kapasidat (p.e. personal), infrastruktura i konosementu ya disponibel pa limitá gastu i sòru pa di kada florin mas tantu sèn posibel ta bai pa mehorá kalidat di bida di famianan ménos pudiente. Pero e gobièrnu di FOL a hasi nèt kontrali. Hecho ta ku 5 sèn di kada florin so ta sobra pa kombatí pobresa.